மன்னார் காற்றாலைத் திட்டம் - ஏனிந்த எதிர்ப்பு

ஐம்பது நாடுகளில் 200 பில்லியன் அமெரிக்க டொலர்களை முதலீடு செய்துள்ள அதானி நிறுவனம் இலங்கையிலும் மன்னாரில் காற்றாலை மின் உற்பத்தியில் ஈடுபடவுள்ளது.

 

ஒரு பில்லியன் அமெரிக்க டொலர்களை அதானி குழுமம் (Adani Enterprises) இந்த திட்டத்தில் முதலீடு செய்ய திட்டமிட்டுள்ளது.

 

இந்த திட்டத்தின் மூலம் திருமலை துறைமுகம் அபிவிருத்தி செய்யப்படுவதுடன் மன்னாருக்கான போக்குவரத்து வீதிகளும் அபிவிருத்தி செய்யப்படவுள்ளன. அத்துடன் மன்னாரை அபிவிருத்தி செய்யும் திட்டங்களும் சமகாலத்தில் முன்னெடுக்கப்படவுள்ளன.

 

காற்றாலை மின் உற்பத்தி திட்டம் காரணமாக வங்காலை பறவைகள் சரணாலயத்திற்கு பறவைகள் வருகை தருவது தடுக்கப்படும் என சுற்றுச்சூழல் ஆர்வலர்கள் சிலர் கூறுகின்றனர். வங்காலை பறவைகள் சரணாலயம் இந்த காற்றாலை மின் உற்பத் திக்கிராமமான தம்பபன்னி கிராமத்திலிருந்து பத்து கிலோமீற்றர் தொலைவில் அமைந்துள்ளது.

 

இந்த திட்டத்தின் மூலம் 380 மில்லியன் யூனிற் தூய மின்சாரத்தை பெற்றுக்கொள்ள முடியும் என இலங்கை மின்சாரசபை இணையத்தளம் தெரிவித்துள்ளது . மன்னார் காற்றாலை மின் உற்பத்தி திட்டத்தை விட பூநகரியிலும் ஒரு காற்றாலை மின் உற்பத்தி திட்டத்தை உருவாக்க அதானி குழுமம் திட்டமிட்டுள்ளது.

 

2018ம் ஆண்டு இலங்கையில் 1793 மெகாவாட் நீர் மின்சாரமும்,1137 மெகாவாட் எரிசக்தி மூலமான மின்சாரமும் 900 மெகாவாட் அனல் மின்சாரமும் இதர மின் உற்பத்திகளு மாக மொத்தம் 4046 மெகாவாட் மின்சாரம் உற்பத்தி செய்யப்பட்டுள்ளது.

 

மன்னாரிலும் பூநகரியிலும் தலா 1000 மெகாவாட் மின்சாரத்தை உற்பத்தி செய்வதற்கு அதானி குழுமம் திட்டமிட்டுள்ளது.

 

மன்னாரிலும் பூநகரியிலும் தலா 1000 மெகாவாட் மின்சாரத்தை அதானி குழுமம் உற்பத்தி செய்யும் பட்சத்தில் மின் வெட்டு என்ற பேச்சுக்கே இடமிருக்காது.

 

ஏற்கனவே நெடுந்தீவு, அனலைதீவு, நயினாதீவு போன்ற தீவுகளில் காற்றாலை மின் உற்பத்தி திட்டத்தை சீனாவுக்கு வழங்க முற்பட்ட போது இந்தியா அதை தடுத்து நிறுத்தியிருந்தது உலகறிந்த இரகசியம்.

 

சீனத்தூதரகம் கூட தனது உத்தியோகபூர்வ டுவிட்டர் பக்கத்தில் மூன்றாவது சக்தி (Third party)ஒன்றின் அழுத்தம் காரணமாகவே சீனாவுக்கு வழங்கப்படவிருந்த திட்டம் இரத்துசெய்யப்பட்டதாக குறிப்பிட்டிருந்தது.

 

சீனா 12 மில்லியன் டொலர் கடன் திட்டத்தின் கீழ் இந்த திட்டத்தை முன்னெடுக்கவிருந்ததாகவும் அதானி குழுமம் 75% மானிய அடிப்படையில் இந்த திட்டத்தை முன்னெடுக்கவுள்ளதாகவும் பிரதியமைச்சர் துமிந்த திஸாநாயக்கா தெரிவித்திருந்தார்.

 

கடந்த 16ம் திகதி மன்னார் காற்றாலை மின் உற்பத்தி திட்டத்திற்கு எதிர்ப்புத்தெரிவித்து கோட்டா கோ ஹோம் போராட்டக்காரர்கள் இந்திய தூதரகத்தின் முன்பாக ஆர்ப்பாட்டமொன்றை நடத்தியிருந்தனர். இந்த ஆர்ப்பாட்டத்தில் பிரதான விடயமாக அதானி குழுமத்துக்கு வழங்கபட்ட திட்டத்தில் வெளிப்படைத்தன்மை பேணப்படவில்லை என்ற குற்றச்சாட்டு முன்வைக்கப்பட்டிருந்தது. அத்துடன் அதானி குழுமத்துக்கு வழங்குமாறு இந்திய பிரதமர் மோடி தன்னை வற்புறுத்தியதாக ஜனாதிபதி கூறியதாக மின்சார சபை தலைவர் கூறியிருந்ததும் இந்த ஆர்ப்பாட்டத்திற்கான அடிப்படைக்காரணங்களுள் ஒன்று.

 

தற்போது நாட்டில் ஏற்பட்டுள்ள பொருளாதார பிரச்னைகளை தீர்ப்பதற்கு அந்நிய முதலீடுகளை வரவேற்கிறோம் ஆனால் அதானி எமக்கு வேண்டாம் என ஆர்ப்பாட்டக்காரகளுள் ஒருவர் Econmy Next இணையத்தளத்திற்கு தெரிவித்துள்ளார். அதானி நரகத்திற்குப்போ என்ற சுலோக அட்டையும் ( Adani go to hell) ஆர்ப்பாட்ட களத்தில் காணப்படுகிறது.