ஆதவன் பக்கம்

எதிர்வரும் வாரத்திலிருந்து எனது எண்ணங்கள், கருத்துக்கள் இந்த வல்வெட்டித்துறை.ORG இணையத்தில் பிரசுரமாகும். ஆக்கங்களை முடிந்தால் வாரம்தோறும்(பிரதி சனிக்கிழமைகள்), முடியாவிட்டால் குறைந்தது மாதம் 2 தடவைகள் வெளியிடவுள்ளேன்.

சிறு வயதிலிருந்தே தந்தையாரின் தமிழையும், குடும்பத்திற்கு அப்பால் நின்று அவர் சமூகத்தில் கொண்டிருந்த ஈடுபாட்டையும் நாள் ஒவ்வொன்றாகப் பார்த்து வந்ததன் தாக்கம் என்னுள்ளும் குடிபெறத் தவறவில்லை..

தந்தையாரைப் போல் தமிழில் உயர் கல்வி கற்கவில்லை என்றாலும், க.பொ.த (சா/த) இல் தமிழில் உயர் சித்தி. 90 களில் தமிழ்சார் போட்டிகளில் கலந்து கொண்டுள்ளேன். நெடியகாடு கணபதி படிப்பக வெள்ளி விழா கட்டுரைப் போட்டியில் முதல் பரிசு பெற்றதும், அதே காலப் பகுதிகளில் வல்வை சனசமூக சேவா நிலையத்தின் அனுசரணையில் வெளியிடப்பட்ட கையெழுத்துச் சஞ்சிகையான ‘அலை ஒளி’ யில் நண்பன் ரஞ்சித்துடன் சேர்ந்து ஆசிரியராக இருந்தவை தான் அப்பொழுது நான் எழுத்து உலகில் இருந்தமைக்கான தற்போது என்னிடம் மிஞ்சியுள்ள ஆதாரங்கள். அண்மையில் என்றால், கடந்த வருடம் கம்பர்மலை பாலன் வேலுப்பிள்ளை ஞாபகார்த்தமாக வருடந்தோறும் யாழின் தேர்ந்துடுக்கப்பட்ட விருதுக்கானவர்களில், ஊடகத்துறையில் இருவரில் ஒருவராக எனக்குக்கிடைத்திருந்தது.

உலகில் தற்போதைய மீடியா இளைஞர்கள் கையில் எனபது வல்வைக்கும் விதி விலக்கல்ல. ஆனாலும்  வல்வையைப் பொறுத்தவரை 1980 – 2000 காலப் பகுதியே அதிகளவு வரலாற்று நிகழ்வுகளைக் கொண்டு அமைந்துள்ளது. இந்த வரலாற்று நிகழ்வுகளை தற்போதைய இளைஞர்கள் பெரிதாக அறிந்திருக்க வாய்ப்பில்லை. இக்காலப் பகுதி நிகழ்வுகள் சிலவற்றை எழுதியுள்ள ஒரு சிலரும் தம்மை முன்னிலைப் படுத்தியும் தமக்கு சார்பாகவுமே பதிவேற்றங்களை நிகழ்த்தியுள்ளனர்.

இதற்கு இன்னொரு காரணம் எனது வயதையொத்த இடைநிலை வயது எழுத்தாளர்கள் என்று எவருமே இல்லை என்பதே ஆகும். வல்வையின் பிரபல எழுத்தாளர்கள் 70 வயதைத் தாண்டியவர்கள். சர்ச்சைக்குரிய எழுத்துக்களை வாதங்களை முன் வைப்பதை தவிப்பவர்கள். ஓரிரு இள வயது எழுத்தாளர்கள் உள்ளனர். அவர்களிடம் இருந்தும் நான் எதிர்பார்ப்பது கிடைக்கவில்லை.

தந்தையாரிடம் இருந்து பெற்ற எனக்கு முன்னரான ஊர் நிகழ்வுகள், பிரதான காலப்பகுதியான 1980 – 2000களில் நானே நேரடியாக பார்த்த அனுபவங்கள், கடந்த 6 வருடங்களாக வல்வையில் இடம்பெற்ற கிட்டதட்ட சகல நிகழ்வுகளின் தொகுப்பின் கைவசம், இந்தத் துறையில் சம்பந்தப்பட்ட (ஓரிருவரைத் தவிர்ந்த) உலகின் சகல பாகங்களிலும் உள்ள சகல வல்வையர்களுடன் உள்ள தொடர்பு, பலமான சமூக வலைத் தளப் பின்னணி, எழுத்தாளன் என்ற நாமம் இல்லாமல் எழுதியுள்ள ஏராளமான பக்கங்கள், பல்லாயிரக் கணக்கான புகைப்படங்கள், உலகின் பல நாடுகளுக்கும் சென்று பல இடங்களைப் பார்த்து அங்குள்ள இடங்களையும், மக்களையும் எமது பிரதேசத்துடன் ஒப்பிட்டு நான் எனுக்குள் பெற்றுள்ள விடயங்கள், எழுத்துப் பின்னணியைக் கொண்டுள்ள எனது குடும்ப வட்டம்....என நீழும் ஒரு பட்டியல் எனது எண்ண எழுத்துக்களை தொடர்ந்து நீடிக்க வைக்கும், பலரைச் சென்றடையும் என்பது திண்ணம்.

வரப்போகும் எனது துணிவான கருத்துக்கள் கண்டிப்பாக பல விமர்சனங்களை ஏற்படுத்தும். விழிப்பை ஏற்படுத்தும். விடலைப் பருவத்தில் அலை ஒளியில் நான் எழுதியிருந்த அன்றைய ஆசிரியர் தலையங்கம் ஒன்றே அப்போது வாசகர் வட்டத்தில் பல விமர்சனங்களை முன் வைத்திருந்தது.

விமர்சனங்கள் எனக்குப் பின்னாலோ அல்லது எனது குடும்பத்தாருடனோ வைக்கப்படக்கூட்டாது, மாறாக என் முன்னாள் அல்லது கீழே உள்ள எனது தொடர்புகளினூடாக முன் வைக்கப்பட வேண்டும்.

ஆக்கங்கள் ஊர் என்று ஒரு வட்டத்துக்குள் மட்டும் இல்லாமல் அதற்கு வெளியேயும் – நான் அனுபவத்தில் பார்த்தவை ரசித்தவை,  எமது இனம், எமது மொழி, எனது சமயம், அரசியல், சமூகத்தில் தீர்க்கப்படாதுள்ள விடயங்கள், ஒப்பீடுகள், புலம் பெயர் மக்களின் வாழ்வியல், தமிழ் திரைப்படங்களின் தாக்கம், தமிழக தொலைக் காட்சிகளில் உள்ள மோகம், தற்போதுள்ள சமூக வலைத் தளங்களின் பாவனை, எனது கால் நூறாண்டு கடல் வாழ்வில் நான் கண்டவை பெற்றவை  என நீளும் - எனது அவா.

ஆக்கங்கள் எனும் பொழுது நிழல் படங்கள் பிரசுரிப்பு எனது தவிர்க்க முடியாத ஒன்று. நான் எழுதுவதால் அங்கொன்று இங்கொன்றாக, கட்டுரைகளுக்கு ஏற்றால் போல், சம்பந்தப்பட்ட நிகழ்வுகளுடன் கூடிய, எனது படம் உங்கள் முன் தோன்றலாம்.

அதிரூபசிங்கம் மாஸ்டர் மகன், இதைவிட தற்போது எனது பெயருக்கு முன்னால் வரும் டைட்டில் – இவை இரண்டும் காலத்தால் அழிக்க முடியாதவை, கடவுள் கொடுத்த கொடை. இவற்றை விட என்னை விளம்பரப்படுத்த எனக்கு வேறு ஒன்றும் தேவை இல்லை – இதைத்தான் என்னைச் சுற்றியுள்ளவர்களிடம் நான் அடிக்கடி கூறிக் கொள்வது.

எனது வேலை சூழ்நிலை, அலைமேல் இருப்பிடம் காரணமாக சில வேளைகளில் ஆக்கங்கள் பிரசுரிப்பது தாமதம் ஆகலாம், ஆனாலும் எழுதுவது தொடர்ந்து கொண்டிருக்கும்

எதிர்வரும் வாரத்திலிருந்து எனது பக்கத்துடன் உங்களைச் சந்திக்கும் வரை,

அதிரூபசிங்கம் ஆதவன்
தொலைபேசி – 00 94 777 64 99 55
மின்னஞ்சல்   - marinerathava@yahoo.com