நெல்சிப் திட்ட முறைகேடு, தொண்டைமனாறு ஆற்றங்கரை வீதி, கொம்மந்தறை கோணாவளை வீதி புணரமைப்பில் 14 லட்சம் ஊழல்?

வட மாகாணத்தில் நடைமுறைப்படுத்தப்பட்ட நெல்சிப் திட்டத்தின் இரு திட்டங்களான தொண்டைமனாறு ஆற்றங்கரை வீதி, கொம்மந்தறை கோணாவளை வீதி புணரமைப்பில் 14 லட்சம் ஊழல் நடைபெற்றுள்ளதாக குற்றம் சாட்டப்பட்டுள்ளது.

குறிப்பிட்ட திட்ட வேலைகளிற்கான ரெண்டரில் 3 ஆவது பகுதியில் கொடுக்கப்படவேண்டிய பணம் 20/- இற்கு பதில் 420/- வும், 5 ஆவது பகுதியில் கொடுக்கப்படவேண்டிய பணம் 900/- இற்கு பதில் 1900/- வும், 20 ஆவது பகுதியில் கொடுக்கப்படவேண்டிய பணம் 75/- இற்கு பதில் 375 /- வும் முறைகேடாக கொடுப்பனவு செய்யப்பட்டுள்ளதாக குற்றம் சாட்டப்பட்டுள்ளது.

ஊழல் தொடர்பில் விசாரண செய்ய குழு அமைப்பு

கடந்த சில நாட்கள் முன்பு நடைபெற்ற வடமாகாணசபை அமர்வில், நெல்சிப் திட்டத்தில் இடம்பெற்றுள்ளதாகக்கூறப்படும் ஊழல் தொடர்பில் குற்றச்சாட்டுக்கள் முன்வைக்கப்பட்டிருந்ததைத் தொடர்ந்து, விசாரணைக் குழுவொன்றை அமைத்துள்ளதாக வடமாகாண ஆளுநர் அறிவித்துள்ளார்.

இதனைத் தொடர்ந்து குறித்த நெல்சிப் வேலைத்திட்டங்களுடன் சம்பந்தப்பட்ட பொறியிலாளர் இடைநிறுத்தம் செய்யப்பட்டுள்ளதாக கூறப்படுகின்றது.

உலக வங்கியின் நிதிப் பங்களிப்புடன் வடகிழக்கு மாகாணங்களில் தமிழ் மக்களின் உட்கட்டுமாண திறன்களை விருத்தி செய்யும் நோக்குடன் உருவாக்கப்பட்ட நெல்சிப் திட்டத்தில் 100 மில்லியன் ரூபாவுக்கும்மேல் கொள்ளையிடப்பட்டுள்ளதாகவும், கொள்ளையர்களை சட்டத்தின் முன் நிறுத்துமாறும், கடந்த 30 ஆம் திகதி யாழ். ஊடக அமையத்தில் நடைபெற்ற பத்திரிகையாளர் சந்திப்பில் கலந்துகொண்டு கருத்து வெளியிட்ட கூட்டமைப்பின் நாடாளுமன்ற உறுப்பினரும், பேச்சாளருமான சுரேஷ் பிறேமச்சந்திரன் குற்றச்சாட்டினை முன்வைத்திருந்தமை இங்கு குறிப்பிடத்தக்கது.