திரு.பொ.வேலும்மயிலும் அவர்களினால் ஆக்கப்பெற்றிருந்த வல்வைக் கீதம்

வல்வைக்கீதம் - வல்வை நகரசபையின் முன்னாள் உபதலைவரும், நாடகம் மற்றும்  விளையாட்டுத்துறை போன்ற பல விடயங்களில் வல்வைக்குப் பெருமை சேர்த்தவருமாகிய, சிவபெருமான் என்று பொதுவாக வல்வையர்களால் அறியப்பெற்ற மறைந்த திரு.பொ.வேலும்மயிலும் அவர்களால் ஆக்கம் பெற்றிருந்தது.

 

 

வல்வைக்கீதம்

 

பல்லவி

வல்வெட்டித்துறை எங்கள் நகரம் ...இது

வளரும் இலங்கா தேவியின் திலகம்

(வல்வெட்டித்துறை)

 

அனுபல்லவி

உள்ளத்தைக் கவர்கின்ற உயர் முக்கோபுரம்

உயிருக்கு உயிராக அமையும் மூவாலயம்

(வல்வெட்டித்துறை)

 

எல்லை இருமருங்கும் எழில் முருகாலயம்

இறைவனின் தூதராம் இயேசுவின் கோயிலும்

கல்லையும் உருக்கும் எம் கெளரியின் ஊர்வலம்

காணுமிடமெங்கும் கடவுளின் ஞாபகம்

(வல்வெட்டித்துறை)

 

வல்லவர் எதிலும் வெற்றியைக் காண்பவர்

வல்வெட்டித்துறை என்னும் நற்பெயர் பூண்பவர்

கல்வியில் தேர்ந்தவர் கவிஞர்கள் ஓவியர்

செல்வர்கள் தந்தைபோல் தேவையை தாங்குபவர்

(வல்வெட்டித்துறை)

 

இல்லை என்பதை என்றும் இறக்கும் துறைமுகம்

இங்கு விளைவதை ஏற்றவும் உதவிடும்

கள்ளக் கடத்தல் என்பர் காலத்தின் ஒரு இடம்

உள்ளத்தை உணர்ந்தோருக்கு இது ஒரு சிறப்பிடம்

(வல்வெட்டித்துறை)

 

கப்பல் கட்டும் கலைத் தீரர்கள் நிலையம்

கடல் பல கடந்திடும் கலங்கா இதயம்

எப்போதும் இறைவனை இறைஞ்சியே தொடரும்

செப்பமொடு சமய சூழலில் வளரும்

(வல்வெட்டித்துறை)

 

வித்தியாசாலை பல வைத்தியசாலை வரை

எத்தனை நூலகங்கள் இயல்இசை நாடகங்கள்

வெற்றி பல நிகழ்த்தும் விளையாட்டுக்கழகங்கள்

அத்தனையும் அழகு ஆபரணங்கள்

(வல்வெட்டித்துறை)

 

காந்திஜி கால்வைத்த கண்ணியமான இடம்

கலைஞரையும் அறிஞரை காண்பித்து ரசித்த இடம்

வேந்தராம் ராஜாஜி நேருஜி வந்த இடம்

நீந்தியே இந்தியாவை நேராகக் கண்ட இடம்

(வல்வெட்டித்துறை)

 

நெல்லிடை பதர் போன்று பல்லிடை மணம் போன்று

உள்ளிருந்தே கொல்லும் புல்லரும் சிலருண்டு

இல்லையெனில் எமக்கு எவர்தான் இங்கிணையுண்டு

இதை நினைற்தோ இறைவன் இவரையும் வைப்பதுண்டு

(வல்வெட்டித்துறை)