1989 வல்வைப்படுகொலைகள் நீண்ட காலத்தின்பின் அனுஸ்டிப்பு

வல்வெட்டித்துறையில் இன்றைய நாளான 1989 ஆம் ஆண்டு ஆகஸ்ட் 2 ஆம் திகதியும் அதனைத் தொடர்ந்து இரண்டு நாட்களும் நடைபெற்ற படுகொலைகள் நிகழ்வு இன்று வல்வையில் அனுஸ்டிக்கப்பட்டது. 

வல்வைப்படுகொலைகள் 1989 பின்னணி 

அன்றைய தினம் காலை சுமார் 0 9 3 0 மணியளவில் ஊரிக்காட்டில் அமைந்திருந்த இந்திய அமைதி காக்கும் படையினரின் (Indian peace keeping forces - IPKF) முகாமிலிருந்து புறப்பட்டு, வல்வெட்டித்துறை - பருத்தித்துறை பிரதான வீதி மற்றும் சிவபுரவீதி வழியாக ரோந்து மேற்கொண்டிருந்த இந்தியப் படையினருக்கும் விடுதலைப் புலிகளுக்கும் இடையில் வல்வை சந்தியை அண்டிய பகுதிகளில் கடும் துப்பாக்கிச் சமர் இடம்பெற்றது.

வல்வைச் சந்தி, பிரதான வீதி, பெட்ரோல் செட் மற்றும் சிவபுரவீதி என்னும் பிரதேசத்தை உள்ளடக்கிய பெட்டி வடிவ பிரதேசத்திலேயே துப்பாக்கிச் சமர் இடம்பெற்றதாலும், காலை நேரம் என்பதாலும் பல பொது மக்கள் சண்டை நடைபெற்ற பகுதிக்குள் அகப்பட்டும் கொண்டனர்.

இந்தச் சம்பவத்தில் 60 ற்கு மேற்பட்ட பொதுமக்கள் கொல்லப்பட்டதுடன், தற்போதைய வல்வை நகரசபைத் தலைவர் திரு.கோ.கருணானந்தராசா உட்பட்ட பலர் படுகாயமடைந்திருந்தனர்.

படுகொலையை அனுடிக்கப்படுமுகமாக வல்வைச் சந்தியில், படுகொலையானவர்களின் உருவைப் படங்களும் படுகொலையைச் சித்தரிக்கும் படங்களும் வைக்கப்பட்டிருந்தன. 

இன்றைய நிகழ்வில் 

முதலாவது சுடரினை, நிகழ்வில் மரணித்தவர்களின் உறவினர்களில் ஒருவரான திரு.மு.பிரேம்குமாரும் அடுத்த சுடரினை, குறித்த சம்பவத்தில் காயமடைந்த வல்வை நகரசபைத் தலைவர் திரு.கோ.கருணானந்தராசா அவர்களும் ஏற்றி வைத்தனர்.

நிகழ்வில் வட மாகாண சபை உறுப்பினர் திரு.M.K.சிவாஜிலிங்கம், வல்வை நகரசபை உறுப்பினர்கள் மற்றும் பொதுமக்கள் கலந்து கொண்டனர். 

நீண்ட இடைவெளியின் பின்னர் படுகொலையானவர்கள் அனுடிப்பு இங்கு நடைபெற்றுள்ளமை குறிப்பிடத்தக்கது.