க.பொ.த (உ/த) பரீட்சை நடைபெற்றுக் கொண்டிருக்கும் நேரம். பரீட்சை 8 மணிக்கு ஆரம்பமாகின்றது. பஸ்ஸை விட்டுவிட்டேன்.
க.பொ.த (உ/த) பரீட்சை நடைபெற்றுக் கொண்டிருக்கின்றது. நேரம் முடிந்து விடைத்தாளைக் கொடுக்க வேண்டிய நேரத்தில் அரைவாசி கேள்விகளுக்கு கூட விடை எழுதவில்லை.
நாளை பரீட்சை, ஆனால் இன்று அரைவாசிப் பாடங்களைக்கூட படித்து முடிக்கவில்லை.
வினாத்தாள்களை தருகின்றார்கள், 10 கேள்விகளில் ஒன்றுக்குக் கூட எனக்கு விடை தெரியவில்லை.
0830 ற்கு பரீட்சை ஆரம்பம், நான் 0835 ற்குப் பிந்திப் போகின்றேன். பரீட்சை நிலையத்தை மாற்றியுள்ளதாக கூறி போக வேண்டிய இடத்தைக் கூறுகின்றார்கள். பரீட்சை நிலையத்தை நோக்கி ஓடுகின்றேன், ஒரே வெளியாக உள்ளது.
நடுத்தர குடும்பம், பின்புல சொத்துக்கள் என்று எதுவுமில்லை. என்யினியர் கனவு அவ்வளவுதான் வாழ்க்கையே சூனியம் ஆகின்றது.
துடித்து எழும்புகின்றேன். கப்பல் கடலில் சென்று கொண்டிருக்கின்றது. தற்பொழுது உள்ள என் தகமையை நினைத்து திருப்திகொண்டு மீண்டும் தூங்குவேன்.
கடந்த சில நாட்கள் முன்பு ஒரே இரவில் இரண்டு கனவுகள், இரண்டும் பரீட்சை பற்றியவை. முதலாவது கனவை முழுமையாக நினைவுக்குக் கொண்டு வர முடியவில்லை. ஆனாலும் எனது வகுப்பு நண்பர்கள் வெளிநாடுகளில் இருந்து பரீட்சைக்கு இலங்கை வருவது மட்டும் பகுதியாக ஞாபகம். இரண்டாவது கனவு – ஹாட்லிக்கு பரீட்சைக்குச் செல்கின்றேன். அங்கு சாரத்துடன் பரீட்சைக்கு வந்துள்ளதைப் பார்த்து சாரத்தை மாற்றி வரச் சொல்கின்றார்கள். 0830 க்கு பரீட்சை. அப்பொழுது மணி 0820. என்ன செய்வது என யோசித்துப் பார்த்து -தூக்கத்தில் இருந்து எழும்புகின்றேன்.
சில மாதங்களுக்கு ஒரு தடவையாவது இப்பொழுதும் என்னைத் தொடர்ந்து துரத்தும் கனவு இது.
க.பொ.த (உ/த) வில் கணித பாடம் படித்தேன். 90 Batch. சகலருக்கும் வரும் எதிர்பார்ப்பு, கனவு போல் எனக்கும் என்சினியர் கனவு. பலரிடம் சென்று படித்தேன். ஆனால் படிப்பதில், படிக்கும் முறையில் சொதப்பி விட்டேன் என்று நினைக்கின்றேன்.
வேலாயுதம் மாஸ்டர், தில்லையம்பலம் மாஸ்டர், நல்லையா மாஸ்டர், வர்ணகுலசிங்கம் மாஸ்டரிடம் மட்டும் மூன்று இடங்களில் (வல்வை கல்வி மன்றம், உடுப்பிட்டியில் பீக்கன், யாவாரிமூலையில் அவர் வீட்டில்)
இதை விட சந்திரிக்கா ரீச்சர், அவர் கணவர் திரு.நாகேந்திரம், சிவலீலன் அண்ணா, திவா அண்ணா, நந்தன் அண்ணா என சிலரிடம் பகுதியாக.
ஏராளமான குறிப்புக்களைச் சேர்த்திருந்தேன். படிக்க வேண்டிய பொறுத்த நேரத்தில் வீதிக்கு வந்ததால் வந்த வினை. முதலாவது முயற்சியில் C, 2S. அடுத்த இரண்டு முறைகளிலும் C, 3S.
என்ஜினியர் ஆகமுடியாமல் போய்விட்டது. இனிமேல் என்ன செய்யப் போகின்றேன் என்று மிக மிக நொந்து போய்விட்டேன். அதன் தாக்கம் தான், இன்று வேறு ஒரு துறையில் நல்ல ஒரு நிலையை அடைந்தாலும், என்னை கனவில் தொடர்ந்து துருத்திவருகின்றது.
என்ஜினியர், வைத்தியர், கணக்காளர் இந்த மூன்றும் தான் இதை விட வேறு ஒன்றுமில்லை – ஆசிரியர்களும் எனது பெற்றோர்களும், என்னைப் போன்றவர்களுக்கு கூறத்தவறிய விடயம். எனது தந்தையார் தனது சிறு வயதில் தான் பல்கலைக் கழகம் செல்லாமல் பின்னர் வெளி வாரியாக படித்துப் பட்டம் பெற்றதால், பிள்ளைகள் நாங்கள் பல்கலைக் கழகப் பட்டம் பெறவேண்டும் என்பதை மட்டுமே கூறி வந்தார். நல்ல விடயம் தான். நடுத்தர குடும்பத்தினருக்கு சாத்தியமான ஒன்றும் இதுதான். ஆகவே தந்தையாரில் குறைபட முடியாது.
ஆனாலும் பிளான் A தவறினால், பிளான் B என்ற ஒன்றை அவர் வைத்திருக்கவில்லை. பல பெற்றோர்கள் விடும் தவறு இது. A/L படித்த பின்னர் பல்கலைக் கழக வாய்ப்பு இல்லாத பலர் இன்றும் குழம்புவதற்கு இதுதான் காரணம். நாட்டின் கல்விக் கட்டமைப்பும் ஒரு காரணம்.
மேல் உள்ள விடயத்தைக் குறிப்பிடவே எனது கனவை பகிர்ந்துள்ளேன். A/L எடுத்து இன்று 25 ஆண்டுகள் கடந்த பின்பும் கனவு தொடர்ந்து வருமளவிற்கு இந்த விடயம் என்னைப் பாதித்துள்ளது.
எல்லோரிடமும் திறமை உள்ளது. ஆனால் பலருக்கு சந்தர்ப்பங்கள் சரியாக வராமல் போய்விடுகின்றது. நான் சரியான நேரத்தில் எடுத்த முடிவும், அதிஸ்டமும் என்னை கப்பலிலும், பாம்பேயிலும் கொண்டுசென்றுவிட்டது.
நாங்கள் யாழ்பாணத்தில் ஆங்கில மீடியத்தில் படிக்கவில்லை, ஆனால் இந்தியாவில் ஆங்கில மீடியத்தில் படித்து எழுமளவிற்கு எனக்குள் திறமை இருந்துள்ளது. இலங்கை A/L கணித பாடம் மிகவும் தரமானது என்பதை இந்தியாவில் படித்தபொழுது தெரிந்துகொண்டேன். அன்று ஓடி, ஓடி பலரிடம் A/L Maths படித்தது எனது Nautical படிப்பை மிகவும் இலகுவாக்கியிருந்தது.
எங்கள் சீனியர் ரமேஸ் அண்ணா (கப்டன் ரமேஸ், பாங்கரின் மகன்) பாம்பேயில் ஒன்றாக இருந்த பொழுது ‘ஆதவன் நாங்கள் இங்கு படிப்பதைப் போல் அங்கு ஊரில் அரைவாசி படித்திருந்தாலே என்ஜினியராக வந்திருப்போம்’ என்று அடிக்கடி கூறுவார்.
பொம்பேயில் எங்களுக்கு இருந்த அழுத்தம், பொறுப்பு, ஊரில் A/L படித்த பொழுது இருந்திருக்கவில்லை.
இப்பொழுதும் பல A/L படிக்கும் மாணவர்களை ஊரில் பார்கின்றேன். அநேகர் நாங்கள் விட்ட அதே பிழையை விட்டுத்திரிகின்றார்கள் (வெளியாகும் முடிவுகளும் இதற்குச்சான்று). நல்ல காலம் நாங்கள் A/L எடுத்த காலங்களில் FB, Whatsup என்று ஒன்றுமில்லை. தெரிந்த ஒன்று இரண்டு பேருக்கு புத்திமதி கூற வெளிக்கிட்டேன், கேட்கின்றார்கள் இல்லை. வெடாவில் 'கட்டாயம் வர வேண்டும்' (Compulsary attendance) போன்ற கண்டிப்பைத் தவிர, வேறு மட்டங்களில் பெரிதாக இருப்பதாகத் தெரியவில்லை.
என்ஜினியர், வைத்தியர், கணக்காளர் என்ற மூன்று துறைகளை விட நூற்றுக் மேற்பட்ட துறைகள் உள்ளன என பாடசாலை, சமூக மற்றும் பெற்றோர் மட்டத்தில் மாணவர்களுக்கு சொல்லப்படவேண்டும். படிக்கின்ற காலத்தில் இருத்திப்படிப்பிக்கவேண்டும். எனக்கு வரும் கனவு போல் வேறும் பலருக்கும் வரக்கூடாது. இது ஒரு துன்பவியல் நிகழ்வு.
சிரிப்புக்காக நான் இந்தப் பக்கத்தை எழுதவில்லை, சிந்திப்பதற்காகவே எழுதியுள்ளேன். எனது நல்ல நேரம் A/L இல் சொதப்பினாலும் அது சார்ந்த ஒரு துறையில் முன்னுக்கு வந்துவிட்டேன். வராதவர்கள் நிலை?
குறிப்பு
எனது எண்ணத்தில் இருந்தவை சிலவற்றை உங்களுக்கும் பகிர எண்ணி கடந்த ஒரு வருடமாக தொடர்ந்து பதியவிட்டுள்ளேன். இன்னும் சில விடயங்களை பதிய விரும்புகின்றேன் - ஒரு இடைவெளியின் பின்னர்.
தொடர்ந்து எனது பக்கங்களை வாசித்து கருத்துக்களைப் பகிரந்த அனைவருக்கும் எனது மனமாரந்த நன்றிகள்.
Comments will be edited (grammar, spelling and slang) and authorized at the discretion of Valvettithurai.org. The website also has the right not to publish selected comments.
Thevarajah Sivakumarasamy (Sri Lanka)
Posted Date: December 11, 2018 at 17:00
Dear Athavan,
All of your releases are good and best advice to the community and students. Keep it up to improve the life styles of our community and best performance in education.
As you aware I am in a charity organization at Point Pedro, Velummayilum Foundation supporting many school in Point Pedro for improve the education level of the poor students. We do support Hartley & MGHS student GCE A/L & OL additional classes per month over 100 thousand rupees. as well as for Hartley hostel students funding for additional expenses and education.
My humble request all the millionaire from VVT living around the world to consider support for GCE O/L & AL education and university going students support as well.
Thanks... T. Sivakumarasamy (Kannan)
Thurailingam (UK)
Posted Date: December 08, 2018 at 14:49
நன்று கூறினீர்கள். கப்டன் ஆதவன்,
இங்கு இங்கிலாந்தில் பணம் நன்கொடை செய்யும் பலரிடம் (சிலர் மிகவும் படித்தவர்கள்) பேசிப்பார்த்தேன். அவர்கள் ‘வலது கை கொடு;ப்பது இடது கைக்கு தெரியாது’ என்ற வாக்குககில் கூறியது போன்ற பெரிய மனதுடன் கொடுக்கிறார்கள். பணம் எப்படிச் செலவு செய்யப்படுகின்றது என்பதில் அவ்வளவு கவலைப்பட முடியவில்லை (அவர்களுக்கு அவகாசமும் இல்லை) நன்கொடை கேட்கிறார்கள் கொடுக்காவிட்டால் ஊர்ப்பகை வேண்டாம் என்று கொடுக்கிறார்கள். நான் இங்கு எழுதுவதற்காக, கொடுப்பவர்கள் கோபப்படத் தேவையில்லை. கொடுக்காமல் இருக்கவும் வேண்டாம். கொடுங்கள் அத்தோடு ஊர் படிப்பு, திறமை, வயது வந்தோர் தொழிற்கல்வி என்பவற்றிலும் நவீனமயமாக வேண்டும் என்பதையும் வற்புறுத்துங்கள்.
நலம் விரும்பும் நன்கொடையாளர்கள் சிலரிடம், நீங்கள் பணம் கொடுப்பதைப் போல இங்கிலாந்தின் படிப்பு முறையை அல்லது உழைப்பு முறையையும் சேர்த்து கொடுப்பதற்கு வழி இல்லையா என்று கேட்டேன். விடையாக மௌனம்தான் கிடைத்தது.
பணத்துடன் சிறந்த படிப்பு முறை சிறந்த தொழிற்கல்வி நவீன வியாபார முறை நவீன சுற்றுலா போன்றவைற்றை வெளிநாட்டிலிருந்து தருவிக்க்க வேண்டும். அதற்கு வெளிநாட்டு நன்கொடையாளர் வற்புறுத்த வேண்டும். உள்நாட்டு பெரியோர்கள் சிந்திக்க வேண்டும். ஊர் பெரியோர்களே நீங்கள் நினைத்தால் நடக்கும். நினைப்பீர்களா? உலகத்திலேயே மிகவும் சிறந்த கல்விமுறை உள்ள வெளிநாட்டு நன்கொடையாளர்களிடம் பணத்திற்குப் பதிலாக சிறந்த கல்விமுறையை கேட்க வேண்டாமா?
உதாரணத்திற்கு இங்கு இங்கிலாந்தில் கப்பற்துறையில் மாத்திரம் 200க்கும் அதிகமான வித்தியாசமான படிப்பு வகைகள் உண்டு. இவை எப்போ ஊர்மக்களுக்கு தெரியவரும் அது தெரியவந்து எப்போது அவற்றின் படிப்பு முறை ஊருக்கு வரப்போகின்றது என்று அங்கலாய்கின்றேன்.
இங்கு இங்கிலாந்தில் பிறெக்சிற் என்ற பிரச்சினையினால் சுமார் ஒரு மில்லியன் சிறந்த தொழிலாளர்களுக்கு வேலை வாய்ப்பு ஏற்படுகிறது. இதை ஊரில் உள்ளவர்கள் பயன்படுத்த முடியுமோ என்று தெரியவில்லை.
அதுவரை உங்களைப் போன்று நவீனத்தைää முற்போக்கை விரும்புபவர்கள் எல்லோரும் வெளிநாட்டுப் படிப்பு முறை ஊருக்கு வரவேண்டும் என்று எழுதவேண்டும். ஊரைப் பகைக்கக் கூடாது என்ற கூற்றை விட்டு எழுதிக்கொண்டு இருக்க வேண்டும்.
கப்டன் துரைலிங்கம்.
எமது செய்திகளின் மறுபதிப்பினை எவரும் செய்ய முடியும், ஆனால் குறித்த எமது செய்திகளில் எதுவித மாற்றமும் செய்யாமல், எமது இணையதளத்தின் (www.valvettithurai.org) பெயரினைக் கண்டிப்பாக குறிப்பிடுதல் வேண்டும்.
